Sherali Jo'rayev

Muqaddas ayol

Oshiqlaring poyingga gul otib ham bo`ldi,
Xilvatlarda labingdan bol totib ham bo`ldi,
Va bu haqda kimlargadir sotib ham bo`ldi,
Sen baribir muqaddassan, muqaddas ayol, ayol,
Sen baribir muqaddassan, muqaddas ayol.

Avval kelib, quchog`imga to`l, balq dedilar,
Unamading – ayol asli ters xalq dedilar,
Yetolmagach yuz o`girib, sho`r talh dedilar,
Sen baribir muqaddassan, muqaddas ayol, ayol,
Sen baribir muqaddassan, muqaddas ayol.

Qimtinasan astagina va egasan bosh,
Mingyillikdir ko`zlaringda jovdiragan yosh,
Gunohkorlar mingu bitta, senga tegar tosh,
Sen baribir muqaddassan, muqaddas ayol, ayol,
Sen baribir muqaddassan, muqaddas ayol.

Harir, xushbo`y badaningda toshlar izi bor,
Ko`kragingda egilgan ne boshlar izi bor,
Quyosh izi kuydirgan ne quyoshlar izi bor,
Sen baribir muqaddassan, muqaddas ayol, ayol,
Sen baribir muqaddassan, muqaddas ayol.

Chorlashganda sen kelsang-da, bekor kelsang-da,
Mast davraga zor kelsang-da xor kelsang-da,
Nomardlarga xor kelsang-da, zor kelsang-da,
Sen baribir muqaddassan, muqaddas ayol, ayol,
Sen baribir muqaddassan, muqaddas ayol. {x2}

Aslida bor ermaklarning borar yeri sen,
Yaxshi-yomon ertaklarning borar yeri sen,
Asov otdek erkaklarning borar yeri sen,
Sen baribir muqaddassan, muqaddas ayol.