• Sherali Jo'rayev - Toshkanli qizcha

    Sherali Jo'rayev

    Toshkanli qizcha

    Oqar suvning o`z jilg`asi, arig`i bor,
    Shu shaharda bir qizchaning ta’rifi bor,
    Unga oshiq bo`lib yurar bir bo`z yigit,
    Ikkisining, aytsam, qiziq tarixi bor.

    Oqar suvning o`z jilg`asi, arig`i bor,
    Toshkanli bir qizchaning ta’rifi bor.

    Ul qizchaning qoshi qalam, ko`zi suzuk,
    Yigit aytar: “Taqsam shunga tillo uzuk”.
    Ko`rib qolsa, xo`rsinadi, til boylanar,
    Ayta olmas ammo unga so`z ham tuzuk.

    Oqar suvning o`z jilg`asi, arig`i bor,
    Toshkanli bir qizchaning ta’rifi bor.
    Unga oshiq bo`lib yurar bir bo`z yigit,
    Ikkisining, aytsam, qiziq tarixi bor.

    Qiz ham asta xo`rsinadi, urar yurak,
    Bo`z yigit ham o`sib qolgan misli terak.
    Qiz o`ylaydi: “Esiz, esiz shunday yigit,
    Indamaydi, tili chuchuk bo`lsa kerak.”

    Oqar suvning o`z jilg`asi, arig`i bor,
    Toshkanli bir qizchaning ta’rifi bor.

    Ul qizchaning yuzlari ham olmagina,
    Halal bermay so`zlarimni tinglagin-a.
    Ko`rib qolsang, orqasidan aqling ozib,
    Bizlar kabi oshiq bo`lib yurmagin-a.

    Oqar suvning o`z jilg`asi, arig`i bor,
    Toshkanli bir qizchaning ta’rifi bor.