• Sherali Jo'rayev - Umr o'tmoqda

    Sherali Jo'rayev

    Umr o’tmoqda

    Esiz-esiz bolalikni qoldirib ortda,
    Umr o`tmoqdadir, umr o`tmoqda.
    Qoldirib, qoldirmay iz bu hayotda,
    Umr o`tmoqdadir daryo misoli.

    Qoldirib, qoldirmay iz bu hayotda,
    Umr o`tmoqdadir daryo misoli.

    Har sahar to`rg`aydan avval uyg`onib,
    Chamanlar yaratish ishqida yonib,
    Ko`cha-guzarlardan ko`ngul dog`lanib,
    Dilni buzarlardan ko`ngul dog`lanib,
    Umr o`tmoqdadir, umr o`tmoqda.

    Ba’zan, ba’zan boy berilib bebaho onlar,
    Bekor o`tgan damga ko`ngul ezilar,
    Ba’zan g`olib kelib tulkisimonlar, {x2}
    Umr o`tmoqdadir, daryo misoli.

    Dengizdek mavj urib, qirg`oqdan toshib,
    Yurar yo`limizdan ba’zan adashib,
    Kimlar bilandir zimdan mansab talashib,
    Umr o`tmoqdadir, umr o`tmoqda.

    O`rinsiz nolayu navozish bilan,
    Ba’zan g`am-tashvish ham honish bilan,
    Kimlargadur asta chox qazish bilan, {x2}
    Umr o`tmoqdadir, umr o`tmoqda.

    Keksalik mo`ralab eshik qoqmoqda,
    Bolalik qaytadan qaytarilmoqda. (x2)
    Bizdan erta kunga nelar qolmoqda? {x2}
    Umr o`tmoqdadir daryo misoli.

    Mard bilan nomardning farqiga bormay,
    Yaxshi-yomonni ham ajrata olmay,
    Sevgan yorlarimiz qadriga yetmay,
    Umr o`tmoqdadir, umr o`tmoqda.

    Sevgan yorlarimiz qadriga yetmay,
    Umr o`tmoqdadir daryo misoli.

    O`lmas sozdan so`ylab tugatolmasman,
    O`chmas izdan so`ylab tugatolmasman,
    Mangulikdan so`ylab tugatolmasman,
    Umr o`tmoqdadir, umr o`tmoqda,
    Umr o`tmoqdadir, daryo misoli.