• Hayot – o`rmon tulkisi,
    Och bo`riga o`xshaydi.
    Tiz cho`kib yo`lbarslari,
    Najot so`rab yig`laydi.

    Hayot – hayot, odamlar
    Goh odamga o`xshamas.
    Xokisor qalb yig`laydi,
    Yetim nolon to`xtamas.

    Hayot – osmon yulduzi,
    Armon deydi eskilar.
    Shohni ham, gadoni ham,
    Mehmon deydi eskilar.

    Hayot – karvon uyasi,
    Sahrodan suv so`raydi.
    Sabrning kosasiga
    O`rgimchak to`r o`raydi.

    Hayot – sharob, quyilib,
    Kayf yarmida tugaydi.
    Bag`irlar kabob bo`lib,
    Kir ko`rada tutaydi.

    Hayot – bevafo go`zal,
    Hech kimga qilmas vafo.
    Bandang bilib bandangni,
    Asragin qodir, Xudo.

    Hayot – bekat, keladi
    Va ketadi qanchalar.
    Kimdir mag`rur yashaydi,
    Kimdir ostona yalar.

    Hayot – achchiq haqiqat,
    U kimga ham yoqardi.
    Haqni haq bilganlarning
    Go`rda sochi oqardi.