• Muhabbatdan yaralganlarim,
    Alla, bolajonlarim, alla.
    Bor boyligim, ko`ngil zarlarim,
    Alla, bolajonlarim, alla.

    Biringiz gul, biringiz bulbul,
    Sizga boqsam, jonimga huzur.
    Xudoyimga behisob shukur-ey,
    Alla, bolajonlarim, alla.

    Siz jismimga, jonimga ustun,
    Bir onaman, men bag`ri butun.
    Mehrim tumor bo`lsin siz uchun,
    Alla, bolajonlarim, alla.

    Mehrim tumor bo`lsin siz uchun,
    Alla, bolajonlarim, alla.

    Ulg`ayingiz yurt so`rab yashab,
    Elingizga baxt tilab yashab.
    Yaxshilar ko`p, ularga o`xshang-ey,
    Alla, bolajonlarim, alla.

    Jonimdagi jonlarim, alla,
    Tishimdagi donlarim, alla,
    Xudo bergan durdonalarim,
    Boqiy baxtim, shonlarim, alla.

    Muhabbatdan yaralganlarim,
    Alla, bolajonlarim, alla.

    Xudo bergan omonatlarim-ey,
    Alla-yo, alla.
    Xazon bo`lmay katta bo`linglar-ey,
    Alla-yo, alla. {x2}