• Ziyoda - Gul edim

    Ziyoda

    Gul edim

    Gul edim…
    Gul edim, bog`imdan erta uzdilar,
    Murg`ak hayotimning qasrin buzdilar.
    Orzu-havaslarim dunyocha edi,
    Bo`g`zimga nopoklar qo`lin cho`zdilar.
    Gul edim, gul edim…

    Tonglarni shom qilar nafs bandalari,
    Elni badnom qilar nafs bandalari.
    Ko`z yoshni sharobdek quyib ichmoqqa
    Kaftini jam qilar nafs bandalari.
    Gul edim, gul edim…

    Ona, ortimdagi ovoraginam,
    Yig`idan ko`z yoshi favvoraginam,
    Taqdirim o`nglashga ming bor urinib,
    Erisha olmagan bechoraginam.
    Gul edim…

    Men netay, hayotga boqib ulgurmay
    Baxtsizman, baxt shamin yoqib ulgurmay.
    Qumloqlarga singib quridi qancha
    Jilg`alar soy tomon oqib ulgurmay.
    Gul edim, gul edim…

    Dilimdan otilib chiqolmas faryod,
    Sir bo`lgan sevgimni qildilar barbod.
    Haqli edim sevgan yorim vasliga,
    Yetmadim yomonlar dastidan, ming dod!
    Gul edim, gul edim…

    Baxtimni sotdingiz, jon otajonim,
    Gunohga botdingiz, jon otajonim.
    Hayot ato qilib, so`ng xato qilib,
    Qaylarga otdingiz, nomehribonim.
    Gul edim, gul edim, gul edim…