Murod Manzur

Musofir yurtlarda yig’ladim ona (Musofir 2)

Har safar tursam gar, atrof begona,
Holim so`rguvchi yo`q, ko`nglim g`amxona.
Xayolan so`zlashib to`rt devor xona,
Men sizni sog`inib yig`ladim, ona.

Yuribman orzuim barorin tilab,
Omadim ber, deya Xudodan so`rab.
Uyga qaytayotganlarning ortidan qarab,
Yur ketdik, desalar ham ketmadim, ona.

Uyga qaytayotganlarning ortidan qarab,
Yur ketdik, desalar ham ketmadim, ona.

Ne qilay, majburman, ishlashim kerak,
Musofirlik nonin tishlashim kerak.
Bahorga yetmoq uchun qishlashim kerak,
Noshukurning so`zin aytmadim, ona.

Sizga aytsam, bunda hayot bizdekmas,
Ovqatlarim turfa, oshim tuzdekmas,
Qahratoni daxshat, qishi bizdekmas,
Bunday qishni aslo ko`rmadim, ona. {x2}

Bunda ko`pdir bolam-chaqam deganlar,
Vodiy, Voha tomonlardan kelganlar.
Bir mayizni qirqqa bo`lib yeganlar,
Shunday insonlar bilan ishladim, ona.

Bu yerlarda ko`rmadim sa’va, bedana,
“Buxanka”dan topolmaysiz bitta sedana.
Ba’zan deyman qo`l siltab: keldim qaydan-a?,
Oxiri ne bo`lar, bilmadim, ona.

Ba’zan deyman qo`l siltab: keldim qaydan-a?,
Oxiri ne bo`lar, bilmadim, ona.

Ba’zan og`ir mehnatdan bezilib ketdim,
Musofirlik xo`p og`ir, sezilib ketdim,
Sizga aytsam, baridan ezilib ketdim,
Onam siqilmasin deb, aytmayman, ona.

Mening ishlash makonim o`rmon tomonda,
Har kun har xil odamlar, oqibat gumonda.
Mehnatgaku chidayman, lek sog`inch yomonda,
Sizni men sog`inib yig`ladim, ona,
Sizni juda sog`inib yig`ladim, ona.

Qishlog`im ko`z o`ngimda turibdi hamon,
Egri-bugri ko`chalarni sog`indim yomon.
Jizzali non bervoring, kim kelsa bu tomon,
Yegim keldi, ochlikdan so`rmadim, ona. {x2}

Bo`pti mayli, Onajon, uxlashim kerak,
Erta tong yana ishga borishim kerak.
Taqdirimga yangi kun bitishim kerak,
Ko`rishguncha xayr, demadim, ona.

Taqdirimga yangi kun bitishim kerak,
Ko`rishguncha xayr, demadim, ona.

Sog`-salomat bo`ling doim – so`radim, ona…

Ushbu qo`shiq matni uchun Borodulla Sayfiyevga minnatdorchilik bildiramiz.