Dilmurod Sultonov

Musofirlar

Aziz boshing omonmi, deb safarlarda,
Onaizor nola qilar saharlarda,
Rizqin izlab, yurib olis tomonlarda,

Har kun hijron zahrin yutgan musofirlar,
Yurt sog`inchi jondan o`tgan musofirlar. (x2)

Aylanadi, o`tib borar vaqt millari,
Musofirga asrdayin oy-yillari. (x2)
Yaqinlarin qo`msaganda ko`ngillari,

Suratlarin quchib yotgan musofirlar,
Yurt sog`inchi jondan o`tgan musofirlar. (x2)

Biri ketgan yolg`iz ukam o`qitay deb,
Chakki tomgan eski tomim tuzatay deb, (x2)
Bo`yi yetgan singillarim uzatay deb,
Umid bilan olis ketgan musofirlar,
Yurt sog`inchi jondan o`tgan musofirlar.

O`g`il-qizin sog`inardi bir kundayoq,
Endi esa yil o`tmoqda o`rtab firoq,
Yorishmaydi yuragiga yoqsang chiroq,
Bolam, deya ma’yus tortgan musofirlar,
Yurt sog`inchi jondan o`tgan musofirlar.

Izg`irinlar joningizdan o`tmadimi?
Nahot, hamon qaytmoq oni yetmadimi?
Kulib turib yuzlarida tabasummi,
Ko`zlarida yoshlar qotgan musofirlar,
Yurt sog`inchi jondan o`tgan musofirlar.

Tuprog`i zar, har qarichi aziz makon,
Izlasangiz, topilgaydir ming bir imkon,
O`z yurtida qadr topgay har bir inson,

Hijronlarga vido ayting, musofirlar,
Yurt bag`riga qayting endi, musofirlar. (x2)

* * *

Дилмурод Султонов – Мусофирлар

Азиз бошинг омонми, деб сафарларда,
Онаизор нола қилар саҳарларда,
Ризқин излаб, юриб олис томонларда,

Ҳар кун ҳижрон заҳрин ютган мусофирлар,
Юрт соғинчи жондан ўтган мусофирлар. (х2)

Айланади, ўтиб борар вақт миллари,
Мусофирга асрдайин ой-йиллари. (х2)
Яқинларин қўмсаганда кўнгиллари,

Суратларин қучиб ётган мусофирлар,
Юрт соғинчи жондан ўтган мусофирлар. (х2)

Бири кетган ёлғиз укам ўқитай деб,
Чакки томган эски томим тузатай деб, (х2)
Бўйи етган сингилларим узатай деб,
Умид билан олис кетган мусофирлар,
Юрт соғинчи жондан ўтган мусофирлар.

Ўғил-қизин соғинарди бир кундаёқ,
Энди эса йил ўтмоқда ўртаб фироқ,
Ёришмайди юрагига ёқсанг чироқ,
Болам, дея маъюс тортган мусофирлар,
Юрт соғинчи жондан ўтган мусофирлар.

Изғиринлар жонингиздан ўтмадими?
Наҳот, ҳамон қайтмоқ они етмадими?
Кулиб туриб юзларида табасумми,
Кўзларида ёшлар қотган мусофирлар,
Юрт соғинчи жондан ўтган мусофирлар.

Тупроғи зар, ҳар қаричи азиз макон,
Изласангиз, топилгайдир минг бир имкон,
Ўз юртида қадр топгай ҳар бир инсон,

Ҳижронларга видо айтинг, мусофирлар,
Юрт бағрига қайтинг энди, мусофирлар. (х2)

Ushbu qo`shiq matni uchun Shahnoza (@shahnoz_art)ga minnatdorchilik bildiramiz.