Farrux Xamraev

Haqqim

Bolam-chaqam deb yo`lga chiqdim,
Olis yurtdan izlab rizqimni.
Ishlatib, so`nggi dam haydamang,
Faqat so`rayman haqqimni.

Ish bitguncha jondan azizsan,
Ish bitgach, shu pulga arziysan.
Deydi oz pul berib, rozi bo`l,
Faqat so`rayman haqqimni.

Qo`llarim qadoqdan yorilib,
Qancha mashaqqatni ko`rdi-ku.
Ey nomard, menga joning emas,
Faqat so`rayman haqqimni.

Ko`zlarin lo`q qilib baqrayib,
Jinniga soladi o`zini.
Haqqim ko`r qilmasin ko`zingni-ey,
Faqat so`rayman haqqimni.

Ne qo`l bilan kirib boraman
Onamning beminnat bag`riga?
Uchrama Xudoning qahriga,
Faqat so`rayman haqqimni.

Erkak uyga quruq kirmasin,
Yo`qchilik boshini egmasin.
Haqqimni ber, haqqim urmasin,
Faqat so`rayman haqqimni.

Rizosiz ishingda unum yo`q,
Bo`lmagay hech ishda ko`ngling to`q.
Davlating yonmasin bo`lib cho`g`,
Faqat so`rayman haqqimni.

Nafsini tiyolmas pul ko`rsa,
Yalab simirsa-yu sidirsa.
Haqqimni ber insofing bo`lsa,
Faqat so`rayman haqqimni.

Mayli, kelmasin menga rahming,
Farzandlarimga kelsin rahming.
Bunchalar qattiq bo`lmasa qahring,
Faqat so`rayman haqqimni. (x2)