Muhammad Ayyub Akmalxon og'li

Alvido Ramazon

Oʻn bir oy kutgandi tashrifingni jon,
Oʻn bir oy bezanmish sen uchun Jinon,
Sogʻinching qonmasdan, tushdi-ku hijron,
Al-firoq, kechalar, al-firoq, ayyom,
Alvido Ramazon, alvido Siyom!

Senda inmish koʻkdan Tavrot-u Injil,
Ibrohim suhufi, Zaburi jamil,
Senda nozil boʻlmish Qurʼoni Jalil,
Sen Kalom oyisan, sunnatining qiyom,
Alvido Ramazon, alvido Siyom!

Sen muruvvat oyi, sahovat oyi,
Ilm-u amal, taqvo, tilovat oyi,
Namoz-u duo-yu ibodat oyi,
Qaniydi etsayding yil boʻyi davom,
Alvido Ramazon, alvido Siyom!

Shaytonlar kishanda, ruhlardir ozod,
Nafs ishi kasod-u, qalb uyi obod,
Malaklar havasda, yomonlar barbod,
Inson oʻzligini topmishdir tamom,
Alvido Ramazon, alvido Siyom!

Bir kechang bor sening, ming oydan afzal,
Bir tunlik ibodat – ming oylik amal,
Umr qisqaligi yetkazmas xalal,
Bu kecha tonggacha salomdir, salom,
Alvido Ramazon, alvido Siyom!

Biz sendan tonmadik, tonma bizdan ham,
Rayyon eshigida kut bizni bir dam,
Shafoatchimiz boʻl, rad etmas Egam,
Sala’mun alaykum va alaykum salom,
Alvido Ramazon, alvido Siyom!

Biz armon yutarmiz, mayli, yaxshi bor,
Kutarmiz oʻn bir oy yana intizor,
Yana diydoringga yetkazsin Gʼaffor,
Borgan-kelganingga ming bor ehtirom,
Alvido Ramazon, alvido Siyom!

Al-firoq, kechalar, alvido Siyom!
Alvido Ramazon, alvido Siyom!

* * *

Ўн бир ой кутганди ташрифингни жон,
Ўн бир ой безанмиш сен учун Жинон,
Соғинчинг қонмасдан, тушди-ку ҳижрон!
Ал-фироқ, кечалар! Ал-фироқ, айём!
Алвидо, Рамазон! Алвидо, Сиём!

Сенда инмиш кўкдан Тавроту Инжил,
Иброҳим суҳуфи, Забури жамил,
Сенда нозил бўлмиш Қуръони Жалил,
Сен Калом ойисан, суннатинг қиём,
Алвидо, Рамазон! Алвидо, Сиём!

Сен мурувват ойи, саховат ойи,
Илму амал, тақво, тиловат ойи,
Намозу дуо-ю ибодат ойи,
Қанийди этсайдинг йил бўйи давом!
Алвидо, Рамазон! Алвидо, Сиём!

Шайтонлар кишанда, руҳлардир озод,
Нафс иши касоду, қалб уйи обод,
Малаклар ҳавасда, ёмонлар барбод,
Инсон ўзлигини топмишдир тамом,
Алвидо, Рамазон! Алвидо, Сиём!

Бир кечанг бор сенинг, минг ойдан афзал,
Бир тунлик ибодат ‒ минг ойлик амал,
Умр қисқалиги етказмас халал,
Бу кеча тонггача саломдир, салом!
Алвидо, Рамазон! Алвидо, Сиём!

Биз сендан тонмадик, тонма биздан ҳам,
Райён эшигида кут бизни бир дам,
Шафоатчимиз бўл, рад этмас Эгам,
Саломун алайкум, ва алайкум салом!
Алвидо, Рамазон! Алвидо, Сиём!

Биз армон ютармиз. Майли, яхши бор,
Кутармиз ўн бир ой яна интизор,
Яна дийдорингга етказсин Ғаффор!
Борган-келганингга минг бор эҳтиром!
Алвидо, Рамазон! Алвидо, Сиём!

Ал-фироқ, кечалар! Алвидо, Сиём!
Алвидо, Рамазон! Алвидо, Сиём!