Yodgor Mirzajonov

Qizaloq

“Dadajon” deb oqshomlari og`rigan qiz,
Suratlarga termulib-la ovungan qiz,
O`ksimagin bu hayotning sinovidan,
Yig`lamagin, otasini sog`ingan qiz.

Farishtalar soching silab, alla aytsin,
Armonlaring shodlik bo`lib senga qaytsin,
O`ylamagin bu hayotning baland-pastin,
Yig`lamagin, otasini sog`ingan qiz.

Senga qarab shoir ko`ngli ezilmasin,
Xafa bo`lma, ko`ngling aslo buzilmasin,
Ne qilay deb umiding hech uzilmasin,
Yig`lamagin, otasini sog`ingan qiz.

Tinch hayoting ba’zan bo`lar ostin-ustun,
Hofiz bugun senga atab kuylar yozsin,
Yolg`izman deb aslo ko`ngling buzilmasin,
Yig`lamagin, otasini sog`ingan qiz.

Yomon kuning taqdir tushga o`girsaydi,
To`ylaringda duo qilib o`tirsaydi,
Atrofingni quvonchlarga to`ldirsaydi,
Yig`lamagin, otasini sog`ingan qiz.

“Dadajon” deb oqshomlari og`rigan qiz,
Suratlarga termulib-la ovungan qiz,
O`ksimagin bu hayotning sinovidan,
Yig`lama qiz…

Ushbu qo`shiq matni uchun Shahnoza (@shahnoz_art)ga minnatdorchilik bildiramiz.