Tohir Mahkamov

O’lsam yig’lamaydi

Omonat dunyodan xor bo`lib o`tsam,
Chin do`st diydoriga zor bo`lib o`tsam,
Besh kunlik umrimni yasholmay o`lsam,
O`lsam yig`lamaydi, bu yetim dunyo.

Daryo irmoqlari sel bo`lar bir kun,
Dilni titroqlari she’r bo`lar bir kun,
Mening barmoqlarim yer bo`lar bir kun,
O`lsam yig`lamaydi, bu yetim dunyo.

Qadrimga yig`laydi qadrim bilganlar,
Dardimga yig`laydi dardim bilganlar,
Yolg`ondan yig`laydi, yolg`on suyganlar,
O`lsam yig`lamaydi, bu yetim dunyo.

Farzandlarim dod deb, dilxun yig`laydi,
Otam qabrimda tik beun yig`laydi,
Suymagan, suyganim bir kun yig`laydi,
O`lsam yig`lamaydi, bu yetim dunyo.