Nodir Xolboyev

Onaizorim

Siyratdagi sirlar ko`chganda tilga,
Ne go`zal tuyg`ular sig`masa dilga,
Ming yillik umidlar bo`lganda sarob,
Nima taskin bo`lar kuygan ko`ngilga?

Ummon bo`lib toshsa ko`zimdagi nam,
Tor ko`rinsa ko`zga shunday keng olam,
Yashamoqdan bezib ketgan chog`larim,
Faqat bir zot bo`lar jonimga malham:
Kunduzi duoda, tunlari bedorim, Onaizorim.

Omadim kelmasa yig`laganim u,
Istirobda bag`rin tig`laganim u,
G`animlarim qonim ichib shodlansa,
Shunday keng dunyoga sig`maganim u.

Men bir sodda kasman, nayrangdan yiroq,
Tortganim istirob, topganim firoq.
Ko`ksimda osig`liq turar hanuz ham
Onam yoshligimda taqgan ko`zmunchoq.
Meni balolardan asrar tumorim, Onaizorim.

Yarimta nonimni ilib ketsa do`st,
El bo`lib, terimni shilib ketsa do`st,
Borimni qo`limdan yulib ketsa do`st,
Dildagi sirimni bilib ketsa do`st,

Kuydirib bag`rimni tilib ketsa do`st,
Yiqilsam, ustimdan kulib ketsa do`st,
Do`st dedim, do`stimdan pand yedim oxir,
Dil berib, oqibat dard yedim oxir.

Arosat ichinda to`lg`onib, yonib,
O`rtanib yashamoq naqadar og`ir.
Bu yorug` dunyoda topganim, borim,
Onaizorim.

Topganim-tutganim bolamga degan,
Har luqma yutganin bolamga degan,
Men ko`rmagan kunlar o`g`limga tortiq,
Bir umr kutganim bolamga degan.

Bolasidan tortsa, kuyganim o`sha,
Duosida aytib, suyganim o`sha,
Olislarga ketsam, sog`inib, alqab,
Suratim ko`ksiga qo`yganim o`sha.
Farzand qayg`usida sochlari qorim, Onaizorim.

Senga ne ulashdim, senga ne berdim?
Faqat g`amni tutdim, faqat dard, ozor.
Ko`zlaringda farzand tashvishin ko`rdim,
Azobimdan meros sochingdagi qor.
Bu telba dunyoda topganim, borim, Onaizorim.

Onaizorim…

* * *

Нодирбек Холбоев – Онаизорим

Сийратдаги сирлар кўчганда тилга,
Не гўзал туйғулар сиғмаса дилга,
Минг йиллик умидлар бўлганда сароб,
Нима таскин бўлар куйган кўнгилга?

Уммон бўлиб тошса кўзимдаги нам,
Тор кўринса кўзга шундай кенг олам,
Яшамоқдан безиб кетган чоғларим,
Фақат бир зот бўлар жонимга малҳам:
Кундузи дуода тунлари бедорим, Онаизорим.

Омадим келмаса йиғлаганим у,
Истиробда бағрин тиғлаганим у,
Ғанимларим қоним ичиб шодланса,
Шундай кенг дунёга сиғмаганим у.

Мен бир содда касман, найрангдан йироқ,
Тортганим истироб, топганим фироқ.
Кўксимда осиғлиқ турар ҳануз ҳам
Онам ёшлигимда таққан кўзмунчоқ.
Мени балолардан асрар туморим, Онаизорим.

Яримта нонимни илиб кетса дўст,
Эл бўлиб, теримни шилиб кетса дўст,
Боримни қўлимдан юлиб кетса дўст,
Дилдаги сиримни билиб кетса дўст,

Куйдириб бағримни тилиб кетса дўст,
Йиқилсам, устимдан кулиб кетса дўст,
Дўст дедим, дўстимдан панд едим охир,
Дил бериб, оқибат дард едим охир.

Аросат ичинда тўлғониб, ёниб,
Ўртаниб яшамоқ нақадар оғир.
Бу ёруғ дунёда топганим, борим,
Онаизорим.

Топганим-тутганим боламга деган,
Ҳар луқма ютганин боламга деган,
Мен кўрмаган кунлар ўғлимга тортиқ,
Бир умр кутганим боламга деган.

Боласидан тортса, куйганим ўша,
Дуосида айтиб, суйганим ўша,
Олисларга кетсам, соғиниб, алқаб,
Суратим кўксига қўйганим ўша.
Фарзанд қайғусида сочлари қорим, Онаизорим.

Сенга не улашдим, сенга не бердим?
Фақат ғамни тутдим, фақат дард, озор.
Кўзларингда фарзанд ташвишин кўрдим,
Азобимдан мерос сочингдаги қор.
Бу телба дунёда топганим, борим, Онаизорим.

Онаизорим…

Ushbu qo`shiq matni uchun Jasur (@KakhramonovJasur)ga minnatdorchilik bildiramiz.